Constitution d’un procureur   par noble homme Michel Loir, sieur du Lude, le 26/08/1590 ;

ou comment, en ces temps troublés, Michel LOIR jure et justifie qu’il n’a pas apporté son aide aux ligueurs conduits par le sieur de Vicques pour assiéger Saint-Sauveur-le-Vicomte (Manche), mais qu’il en a été la victime ...

Contexte historique
La huitième guerre de religion (1588-1598), et plus spécifiquement, les troubles de la ligue à Saint-Sauveur-le-Vicomte (Manche).

Photos de l’acte original par F. Heusey (p135 à 138 sur lesEcritoires.free.fr)
Source : archives départementales de la Manche, référence 5E6535 - Minutier d’Octeville, Vicomté de Valognes - sous  -division "Siège de la Hague" (1573-1590) - Vincent Henry, tabellion.

Transcripteur
Laurence Hervieu - 26 mars 2014
(merci de ne pas maltraiter ce travail en le recopiant, faites plutôt un lien !)

Transcription
selon les règles applicables pour les textes de cette époque, les finales en -ée sont accentuées, et l’accent grave peut être utilisé sur les lettres a, e et u dans les prépositions et les adverbes monosyllabiques pour les distinguer des mots homographes (à, là, dès, lès, où). La lettre e à l’intérieur d’un mot (maniere, pere, present) n’est jamais accentuée.

Légende
[...] : lettres ou mots non déchiffrés ;
[mots ou parties de mots entre crochets] = lecture possible et probable mais incertaine ;
\mots entre 2 barres obliques/ : transcription des mots en marge ou en interligne ;
\mots rayés entre 2 barres obliques/ : partie de texte annulée et rayée par le rédacteur de l’acte.

Page 1

Le vingt sixiesme jour d’aust, l’an mil
Vc IIIIXX et dix.

A tous ceulx qui ces presentes lettres verront
ou orront  , Richard Lebyez, sieur de Cante[rane],
viconte et garde des sceaulx des obligations
de la viconté d’Allençon en Costentin pour
le roy nostre sire, salut. Scavoir faisons
que, par devant Vincent Henry et Gregoire
Fantin dict Soleil, tabellions royaulx
en ladicte viconté pour le siege de la Hague ;
en la maison et manoir de noble homme Jean
de Grymouville, sieur de Tournebu et Fourneville
audict lieu de Fourneville, fut present
en sa personne, noble homme Michel
Loir, sieur du Lude, gisant en ung lict,
soy disant   aagé de soixante et dix ans
ou viron et estre mallade ; lequel
a faict nommey, constitué et estably son
procureur   general et certain messager
especial  . C’est à scavoir : [nom laissé
en blanc], auquel ledict sieur constituant
a donné plain pouvoir, puissance et authorité
de sa personne, representer en jugement et hors
jugement par devant tous juges ou com[mysseres]

Extrait du 5 E 6535 aux archives départementales de la Manche (photo F. Heusey)

Laurence HERVIEU Paléographie : abréviation de "con, com"

Page 2
de quelque qualité qu’ilz soyent, tant en
demaindant que deffendant, proposer, \respondre/, repliquer,
duplicquer, doulloir  , appeller, et en relever
appel sy besoing est, eslire domicille et
faire et negocyer aulx affaires dudict constituant,
tout et ainsy que sy present y estoit en personne ;
et par espetial  , de comparoir pour luy
par devant le sieur bailly de Sainct Saulveur
le Viconte ou son lieutenant, et dyre et declaré
qu’il perciste à sa declaration qu’il y a cy
devant faicte par autre procuration qu’il
avoit passée et donoyée audict lieu de Sainct Saulveur
par devant ledict sieur bailly dont il avoit
laissé coppie au greffe, par laquelle il
entend avoir jurey et affermé comme il
jure encores et afferme par devant nous,
qu’il n’a jamays porté ny faict porter
les armes contre la majesté du roy
et n’a donné ayde, conseil ny conford
aulx ligueurs et rebelles de sadicte majesté,
disant bien que lors que le sieur de
Vicques, luy et ses troppes, se vindrent

Extrait du 5 E 6535 aux archives départementales de la Manche (photo F. Heusey)

Laurence HERVIEU Paléographie : abréviation de "con, com" et "et"

Page 3
camper devant le chasteau dudict lieu
de Sainct Saulveur, le sieur de Sainct Germain
et sa compagnie vindrent et entrerent par force
dans la maison dudict constituant en laquelle ilz
prindrent ce qu’ilz virent bon et forcerent
ledict sieur \constituant/ de leur cercher des vivres pour
les nourir ; lequel ilz trouverent en sadicte
maison à cause de sa debilité   et viellesse ;
et voyant que lesdicts gendarmes   prenoyent
ses biens qu’ilz emportoient de jour en jour,
et qu’ilz avoyent encommencer de prendre
tous ses chevaulx, tant de ses harnoys que
pour s’enfuir qu’ilz avoyent chargez de ses
biens \tant de bien et aultres provisions que
aultrement, il fut contrainct d’en faire/, il fut
contrainct d’en faire recherche et aller trouver
ledict sieur de Vicques estant logé en la maison du
sieur viconte de Vallongnes audict lieu de Sainct Saulveur
pour luy en fere complaincte   et remonstrance \à ce qu’il/ luy fest
faire en raison des vollementz et larcins que luy
faisoyent ceulx de sadicte compagnye, speciallement
ladicte compagnie dudict sieur de Sainct Germain dont
il n’a peu avoir aulcune raison. Et ne leur
a jamays donné aulcune ayde, ny faict nul
port d’armes, comme il a predict  , n’ayant

Extrait du 5 E 6535 aux archives départementales de la Manche (photo F. Heusey)

Page 4
pour toultes armes que son espée, comme aussy il
en atend toultes personnes d’honneur et qu’il n’a
jamays entré durant ledict siege dans une
seulle maison dudict lieu de Sainct Saulveur, ny
presté ayde ny conford audict sieur de Vicques, ny
à ceulx de ses troppes ; par contraire, s’est
[tres] fuy et absenté, voyant les molestes   qu’ilz
luy faisoyent et qu’il ne pouvoit plus resister,
doubtant la prise de sa personne veu les
menaces qu’ilz luy faisoyent, se retyra et absenta
de sa maison pour eviter à leur furye chez et en
la maison dudict sieur de Tournebu son oncle, où il est
encores à present, gisant en ung lict mallade \dès/ il y a
quinze jours, comme il envoye par attestation d’un
chirurgien et barbier   qui le pensse en sadicte malladye ;
au moyen de laquelle il luy est impossible de
pouvoir comparoir, ainsy qu’il a jurey et affirmé, parllant à
nous sur le peril de son ame, et toult ce que dessus,
estre veritable. Et à ce moyen, a supplyé et requis ledict sieur
bailly de le dispencer de la comparence qu’il luy a
ordonné le lundy vingtiesme de ce present moys et an [qui]
est impossible fere par ce moyen.

[Signatures :] [...] ; [...] ; de Grymouville.

Extrait du 5 E 6535 aux archives départementales de la Manche (photo F. Heusey)

Laurence HERVIEU Paléographie : abréviation de "con, com" et "par"

Transcription Paléographie Laurence Hervieu 26/03/2014. Merci de ne pas maltraiter ce travail en le recopiant, faites plutôt un lien !

Contact, demande de devis pour un cours de paléographie, une transcription d’actes anciens, un stage, une formation : Laurence Hervieu.